మూత్రాన్ని తరచూ ఆపుకోవడం వల్ల ఏమవుతుంది?
ఎప్పుడో ఒకసారి మూత్రం వచ్చినా తాత్కాలికంగా ఆపుకోవడం పెద్ద సమస్య కాదు.
కానీ ప్రతిసారి మూత్రం వచ్చినప్పుడు బాత్రూంకు వెళ్లకుండా ఆపుకుంటూ ఉంటే, అది క్రమంగా యూరిన్ ఇన్ఫెక్షన్ (UTI) కి దారి తీస్తుంది.
ఇంట్లో ఉండే మహిళలు మరియు వృద్ధులు ముఖ్యంగా సెల్ఫోన్ చూస్తూ లేదా టీవీ చూస్తూ ఉండగా, ఇతర పనుల్లో బిజీగా ఉన్న సమయంలో యూరిన్ వచ్చినా “తర్వాత వెళ్దాం” అని మూత్రానికి వెళ్లకుండా ఆపుకుంటూ ఉంటారు. ఇలా ఒక్కసారి కాదు, ప్రతిసారి మూత్రాన్ని ఆపుకునే అలవాటు ఏర్పడితే అది ప్రమాదకరంగా మారుతుంది.
మూత్రం ఎక్కువసేపు శరీరంలోనే ఉండిపోవడం వల్ల బ్లాడర్లో బ్యాక్టీరియా పెరిగి, మనకు తెలియకుండానే యూరిన్ ఇన్ఫెక్షన్ సోకే అవకాశం ఉంటుంది. మొదట చిన్న సమస్యగా కనిపించినా, కాలక్రమేణా ఇది మంట, నొప్పి, తరచూ మూత్రం రావడం వంటి సమస్యలకు దారి తీస్తుంది. కాబట్టి మూత్రం వచ్చిన వెంటనే బాత్రూంకు వెళ్లే అలవాటు చేసుకోవడం ఆరోగ్యానికి చాలా అవసరం.
బయట పని చేసే మహిళలు, ఉద్యోగస్తులు చాలాసార్లు ఆఫీస్లో లేదా పబ్లిక్ ప్రదేశాల్లో ఉన్న బాత్రూంలు క్లీన్గా లేవని అనిపించడం లేదా బాత్రూంకి వెళ్తే ఇతరులు ఏమనుకుంటారో అనే సంకోచంతో మూత్రాన్ని ఆపుకుంటూ ఉంటారు. ఇలా తరచూ మూత్రాన్ని ఆపుకోవడం అలవాటుగా మారితే, మూత్రం ఎక్కువసేపు బ్లాడర్లో ఉండిపోయి బ్యాక్టీరియా పెరిగే అవకాశం ఉంటుంది. దాంతో మనకు తెలియకుండానే యూరిన్ ఇన్ఫెక్షన్ ఏర్పడి, మంట, నొప్పి, తరచూ మూత్రం రావడం వంటి సమస్యలు వస్తాయి. అందుకే అసౌకర్యం లేదా భయం కన్నా ఆరోగ్యానికే ప్రాధాన్యం ఇవ్వాలి.
అంతేకాదు, స్కూల్లలో, కాలేజ్లలో, ఆఫీస్లలో యూరిన్ వచ్చినప్పుడు మొహమాటపడకుండా వెంటనే బాత్రూంకు వెళ్లేలా మన మైండ్ను మార్చుకోవాలి. ముఖ్యంగా అమ్మాయిలు ఈ సమస్యను ఎక్కువగా ఎదుర్కొంటూ ఉంటారు. స్నేహితులు ఏమనుకుంటారో, టీచర్ లేదా ఆఫీస్లో అనుమతి అడగాల్సి వస్తుందేమో అనే భయంతో మూత్రాన్ని ఆపుకుంటే, అది అలవాటుగా మారి చిన్న వయసులోనే యూరిన్ ఇన్ఫెక్షన్ బారిన పడే అవకాశం ఉంటుంది. కాబట్టి ఆరోగ్యాన్ని నిర్లక్ష్యం చేయకుండా, అవసరమైనప్పుడు వెంటనే యూరిన్కు వెళ్లే అలవాటు చేసుకోవడం చాలా ముఖ్యం.
మూత్ర ఇన్ఫెక్షన్ అంటే ఏమిటి?
మూత్ర ఇన్ఫెక్షన్ అనేది మూత్ర వ్యవస్థలో బ్యాక్టీరియా లేదా ఇతర సూక్ష్మజీవులు చేరడం వల్ల కలిగే సమస్య. ఈ ఇన్ఫెక్షన్ సాధారణంగా ఈ.కోలై (Escherichia coli) అనే బ్యాక్టీరియా వల్ల వస్తుంది, ఇది సాధారణంగా పేగుల్లో ఉంటుంది కానీ మూత్ర నాళాల ద్వారా మూత్రాశయంలోకి ప్రవేశిస్తుంది.
మూత్ర ఇన్ఫెక్షన్కు కారణాలు
- బ్యాక్టీరియా ప్రవేశం: ఈ.కోలై బ్యాక్టీరియా మూత్ర నాళిక ద్వారా మూత్రాశయంలోకి చేరడం
- పరిశుభ్రత లోపం: వ్యక్తిగత శుభ్రత సరిగా పాటించకపోవడం
- తక్కువ నీరు తాగడం: నీరు తక్కువగా తాగితే మూత్రంలో బ్యాక్టీరియా పెరగడం
- మూత్రాన్ని ఆపుకోవడం: ఎక్కువసేపు మూత్రం ఆపుకోవడం
- వైద్య సమస్యలు: మధుమేహం, కిడ్నీ స్టోన్స్, రోగనిరోధక శక్తి తగ్గడం
- మహిళల శరీర నిర్మాణం: మూత్ర నాళిక చిన్నగా ఉండటం వల్ల ఇన్ఫెక్షన్ సులభంగా రావడం
సాధారణ లక్షణాలు
మూత్ర ఇన్ఫెక్షన్ ఉన్నప్పుడు సాధారణంగా మూత్రం పోయేటప్పుడు మంట లేదా నొప్పి అనిపిస్తుంది. తరచూ మూత్రం రావాలనే భావన కలుగుతుంది కానీ పోయే సమయంలో మాత్రం చాలా తక్కువగా వస్తుంది. మూత్రం మబ్బుగా కనిపించడం లేదా దుర్వాసన రావడం కూడా ముఖ్యమైన లక్షణాలు. అలాగే కడుపు దిగువ భాగంలో నొప్పి లేదా అసౌకర్యం ఉంటుంది. ఇన్ఫెక్షన్ తీవ్రత పెరిగితే కొన్నిసార్లు జ్వరం, వాంతులు రావడం కూడా జరుగుతుంది, అలాంటి పరిస్థితుల్లో వెంటనే వైద్యుడిని సంప్రదించడం అవసరం.
నివారణ చర్యలు
తగినంత నీరు తాగండి: రోజుకు కనీసం 8–10 గ్లాసుల నీరు తాగడం అలవాటు చేసుకోండి. ఇలా చేయడం వల్ల మూత్రనాళాల్లోని బ్యాక్టీరియా బయటకు వెళ్లిపోతాయి.
మూత్రాన్ని ఆపుకోవద్దు: మూత్రం వచ్చిన వెంటనే ఆపకుండా బాత్రూమ్కు వెళ్లండి. ఎక్కువసేపు ఆపుకోవడం ఇన్ఫెక్షన్కు దారితీస్తుంది.
శుభ్రమైన బాత్రూమ్ వాడండి: వీలైనంతవరకు శుభ్రత ఉన్న బాత్రూమ్లనే ఉపయోగించండి.
రోజువారీ అలవాట్లు: సౌకర్యవంతమైన కాటన్ లోదుస్తులు ధరించడం, చెమట ఎక్కువగా నిల్వ కాకుండా చూసుకోవడం మంచిది
గమనిక: ఆరోగ్య నిపుణులు, అధ్యయనాల ప్రకారం ఈ వివరాలను అందించాం. ఈ కథనం కేవలం మీ అవగాహన కోసమే. ఆరోగ్యానికి సంబంధించిన ఏ చిన్న సమస్య ఉన్నా వైద్యులను సంప్రదించడమే ఉత్తమ మార్గం. గమనించగలరు..