షుగర్ ఉన్నవారికి చిన్న గాయం అయితే ?

షుగర్ ఉన్నవారికి చిన్న గాయం అయితే ?

షుగర్ ఉన్నవారికి చిన్న గాయం కూడా ఎంత పెద్ద నష్టాన్ని కలిగించగలదో అనే అవగాహన ముందుగా ఉండదు, గాయం జరిగిన వెంటనే జాగ్రత్తలు తీసుకోవాల్సిన అవసరం ఏమిటో తెలియక, నష్టం జరిగిన తర్వాత మాత్రమే ఆ నిజం అర్థమవుతుంది.

ముఖ్యంగా గ్రామాల్లో నివసించే వారు లేదా ఈ విషయంపై అవగాహన లేని వ్యక్తులు గాయమైతే “చిన్న గాయమే కదా” అని నిర్లక్ష్యం చేస్తారు.

గాయం అయిన చోట శుభ్రంగా కడగడం, షుగర్ స్థాయిలను చెక్ చేయడం వంటి జాగ్రత్తలు తీసుకోకుండానే ,రోజువారి పనుల్లో మునిగిపోతారు, మొదట పెద్దగా కనిపించని ఆ చిన్న గాయం, చిలికి చిలికి గాలి వాన అయినట్టుగా క్రమంగా పెద్ద ఇన్ఫెక్షన్‌గా మారుతుంది, చివరకు ఆ గాయమైన భాగాన్ని కూడా తొలగించాల్సిన పరిస్థితి రావడం నిజంగా బాధాకరం, కాబట్టి షుగర్ ఉన్నవారు ప్రతి చిన్న గాయాన్నీ సీరియస్‌గా తీసుకుని వెంటనే సరైన జాగ్రత్తలు తీసుకోవడం ఎంతో అవసరం.

చిన్న గాయం పెద్ద నష్టాన్ని ఎలా కలిగిస్తుంది అంటే

షుగర్ ఎక్కువగా ఉన్నప్పుడు శరీరంలోని రోగనిరోధక శక్తి బలహీనపడుతుంది, బ్యాక్టీరియా గాయంలోకి సులభంగా ప్రవేశించి ఇన్ఫెక్షన్‌కు కారణమవుతుంది, చిన్న గాయం కాస్తా వాపు పెరగడం, నొప్పి ఎక్కువవడం లాంటివిగా మారుతుంది, ఇంకా ప్రమాదకరమైన విషయం ఏమిటంటే డయాబెటిస్ వల్ల నరాలు దెబ్బతింటాయి. అందుకే గాయం ఉన్నా కూడా నొప్పి పూర్తిగా తెలియకపోవచ్చు.

శరీరంలో షుగర్ కంట్రోల్‌లో లేకపోతే రక్తప్రసరణ నెమ్మదిస్తుంది, గాయానికి అవసరమైన ఆక్సిజన్, పోషకాలు సరిగా చేరవు, ఫలితంగా ఆ గాయం మానడానికి చాలా సమయం పడుతుంది.

షుగర్ ఉన్నవారిలో నరాల పనితీరు తగ్గిపోవడం వల్ల గాయం ఉన్నా నొప్పి స్పష్టంగా అనిపించకపోవచ్చు. చికిత్స ఆలస్యం అయితే గాయం ముదిరి లోతైన ఇన్ఫెక్షన్‌కు దారి తీస్తుంది, కొన్ని సందర్భాల్లో కణజాలం పూర్తిగా దెబ్బతిని గ్యాంగ్రిన్ స్థితి ఏర్పడుతుంది.

అప్పుడు ఇన్ఫెక్షన్ శరీరమంతా వ్యాపించకుండా ప్రాణాలు కాపాడేందుకు వేలు లేదా కాలు తొలగించాల్సిన పరిస్థితి కూడా రావచ్చు.

గాయమైన వెంటనే ఏం చేయాలి?

గాయం అయిన వెంటనే గాయం చిన్నది అని దానిని నిర్లక్ష్యం చేయవద్దు.

గాయమైన చోట వెంటనే గాయని శుభ్రంగా కడిగి యాంటి సెప్టిక్ ని ఉపయోగించాలి

షుగర్ ఎక్కువగా ఉంటే గాయం మానటానికి చాలా రోజులు పడుతుంది, అందుకే వెంటనే షుగర్ ని చెక్ చేసుకుని షుగర్ ని కంట్రోల్ లో ఉండేటట్టు చూసుకోండి,

గాయమైన వెంటనే గాయం చిన్నదని, దానిని నిర్లక్ష్యం చేయకుండా వెంటనే డాక్టర్ దగ్గరికి వెళ్లి డాక్టర్ని సంప్రదించండి.

గాయం చిన్నదా పెద్దదా అన్నది ముఖ్యం కాదు, చిన్న గాయాన్ని కూడా నిర్లక్ష్యం చేస్తే దాని వల్ల కలిగే నష్టం మనం ఊహించలేనంత పెద్దదిగా మారవచ్చు, ముఖ్యంగా  గాయం చిన్నదిగా కనిపించినా వెంటనే గుర్తించి సరైన జాగ్రత్తలు తీసుకోవాలి. సమయానికి తగిన చికిత్స తీసుకుంటే పెద్ద ప్రమాదాన్ని ముందే నివారించవచ్చు.

చిన్న జాగ్రత్తే పెద్ద నష్టాన్ని ఆపుతుంది , జరిగే నష్టాన్ని ఎదురు చూడకుండా ముందే గుర్తించి సరైన జాగ్రత్తలు తీసుకోవడం షుగర్ ఉన్నవారికి ఆరోగ్యం మాత్రమే కాదు, భయంలేని సంతోషమైన జీవితం కూడా ఇస్తుంది.